Reamker រឿងរាមកេរ្តី៍

  ចម្បាំងនឹងកុម្ព័ន្ធភនុរាជនិងវិរុណាផាត់(187-190) យក្យមួយឈ្មោះកុម្ព័ន្ធភនុរាជនៅនគរសិរីសិនមានកូនប្រុសឈ្មោះវិរុណាផាត់។កុម្ព័ន្ធភនុរាជជិះរាជរថទឹមរាជសីហ៍ វិរុណាផាត់ដែលជាកូនជិះសេះនាំពលសេនាទៅលេងព្រៃឃើញមានឥសីច្រើនក៏ខឹង ហើយឲ្យសេនាដេញវាយរត់ខ្ចាត់ខ្ចាយព្រមទាំងរុះរើអាស្រមអស់។កុម្ព័ន្ធភនុរាជនិងវិរុណាផាត់ធ្វើដំណើរព័ទ្ធនគរកៃយកេតហើយវិរុណាផាត់ចូលទៅក្នុងវាំងដេញចាប់ស្រីៗធ្វើឲ្យព្រះបាទកៃយកេតភ័យរត់ចូលក្នុងព្រៃនិងឲ្យសេនានាំសារទៅទួលព្រះរាមទើបព្រះរាមឲ្យព្រះភិរុត ព្រះសុត្រុតនិងរាមលក្ម្សណ៍ ជបលក្ម្សណ៍លើកទ័ពទៅជួយនគរកៃយកេត។ព្រះភិរុត ព្រះសុត្រុត និងរាមលក្ម្សណ៍ ជបលក្ម្សណ៍លើកទ័ពទៅជិតដល់នគរកៃយកេត ប្រើជម្ពូរាជនាំសារទៅប្រាប់កុម្ភ័ន្ធភនុរាជឲ្យលើកទ័ពដកថយទៅវិញតែកុម្ព័ន្ធភនុរាជមិនព្រមក៏កើតជាការប្រយុទ្ធគ្នា។រាមលក្ម្សណ៍ ជបលក្ម្សណ៍ចូលច្បាំងហើយទ័ពស្វាសម្លាប់ពួកយក្យអស់ជាច្រើន។រាមលក្ម្សណ៍ ផ្លែងសរទៅត្រូវវិរុណាផាត់ស្លាប់ ហើយផ្លែងសរទៀតទើបត្រូវកុម្ព័ន្ធភនុរាជស្លាប់។